TRANSCHEGARAVIY EKOLOGIK MUAMMOLARNI HAL QILISHDA XALQARO-HUQUQIY YONDASHUVLAR

Аннотация

Globallashuv sharoitida transchegaraviy ekologik muammolar (havo ifloslanishi, suv resurslarining tanqisligi, biologik xilma-xillikning yo'qolishi va iqlim o‘zgarishi kabi) dolzarb ahamiyat kasb etmoqda. Ularning milliy chegaralardan tashqariga chiqishi, oqibatlarining keng ko‘lamliligi va o‘zaro bog‘liqligi ushbu muammolarni hal etishda faqatgina milliy choralar yetarli emasligini, balki xalqaro hamkorlik va samarali huquqiy mexanizmlarni talab qilishini ko‘rsatadi. Mazkur tezis transchegaraviy ekologik muammolarni hal etishga qaratilgan mavjud xalqaro-huquqiy yondashuvlarni atroflicha tahlil qilish, ularning samaradorligini baholash hamda ushbu yondashuvlarni milliy qonunchilik va amaliyotga tatbiq etish imkoniyatlarini o‘rganishni maqsad qilgan. Tadqiqotda qiyosiy-huquqiy tahlil, tizimli yondashuv, xalqaro shartnomalar, konvensiyalar, deklaratsiyalar va boshqa me’yoriy-huquqiy hujjatlarni o‘rganish kabi metodlardan foydalanilgan. Shuningdek, xorijiy davlatlarning ilg‘or tajribalari va xalqaro sud amaliyoti ham ko‘rib chiqilgan. Tahlillar shuni ko‘rsatadiki, xalqaro ekologiya huquqi rivojlanish jarayonida bo‘lsa-da, ayrim sohalarda, xususan, ijro mexanizmlari, javobgarlik masalalari va rivojlanayotgan davlatlarning imkoniyatlarini oshirishda takomillashtirishga muhtoj. Ushbu tezis xalqaro ekologiya huquqining nazariy va amaliy jihatlarini chuqurlashtirishga, O‘zbekistonning transchegaraviy ekologik hamkorlikdagi ishtirokini optimallashtirishga hamda barqaror rivojlanish maqsadlariga erishishga xizmat qiladi.