BOSHLANG'ICH SINFLARDA STEAM TEXNOLOGIYASI ASOSIDA XALQARO BAHOLASHDAGI AHAMIYATI

Abstrak

Ushbu maqolada boshlang‘ich sinflarda STEAM ta’lim texnologiyasini joriy etishning ahamiyati, uning xalqaro baholash tizimlari bilan bog‘liqligi tahlil qilinadi. STEAM yondashuvi fanlarni integratsiyalashgan holda o‘qitib, o‘quvchilarning bilim, ko‘nikma va kompetensiyalarini rivojlantirishga xizmat qiladi. Ayniqsa, mantiqiy fikrlash, ijodkorlik va muammolarni hal qilish qobiliyatlarini shakllantirishda muhim o‘rin tutadi. PISA va TIMSS dasturlari talablariga ko‘ra, o‘quvchilar bilimni real hayotiy vaziyatlarda qo‘llay olishi zarur. Shu jihatdan STEAM ta’limi ushbu kompetensiyalarni rivojlantirishga mos keladi. Maqolada O‘zbekiston ta’lim tizimida STEAMni joriy etish, laboratoriyalarni modernizatsiya qilish, raqamli resurslardan foydalanish va o‘qituvchilar malakasini oshirish jarayonlari ham yoritilgan. Tadqiqot natijalari STEAM yondashuvi o‘quvchilarning akademik va ijodiy salohiyatini oshirishini ko‘rsatadi. Bu esa xalqaro baholashlarda yuqori natijalarga erishish va global raqobatbardoshlikni ta’minlashga xizmat qiladi.