KOREYS TILINI O‘RGANISHNING 6 TA ZAMONAVIY USULI

Аннотация

Bugungi globallashuv sharoitida xorijiy tillarni o‘rganish shaxsning ta’limiy, kasbiy va madaniy imkoniyatlarini kengaytiruvchi muhim omillardan biridir. So‘nggi yillarda koreys tilini o‘rganishga bo‘lgan xalqaro qiziqishning ortishida Janubiy Koreyaning iqtisodiy va texnologik rivojlanishi, oliy ta’lim imkoniyatlari, K-pop, K-drama va boshqa madaniy mahsulotlarning global tarqalishi muhim rol o‘ynamoqda. Xususan, King Sejong Institute Foundation ma’lumotlariga ko‘ra, 2023-yilda dunyo bo‘yicha 216 226 nafar tinglovchi King Sejong institutlarining onlayn va oflayn koreys tili kurslarida tahsil olgan; bu ko‘rsatkich 2022-yildagi 178 973 nafar o‘quvchiga nisbatan 20,8 foizga ko‘pdir [1]. Mazkur holat koreys tilini samarali o‘qitish va o‘rganish metodlarini ilmiy jihatdan takomillashtirish zaruratini kuchaytiradi.

Ushbu maqolada koreys tilini o‘rganishda qo‘llanishi mumkin bo‘lgan oltita zamonaviy yondashuv — raqamli flashcard va interval asosida takrorlash, tajribali o‘qituvchi feedbacki, sun’iy intellekt vositalari, koreys audiovizual kontentidan foydalanish, kundalik yozma amaliyot hamda TOPIK orqali diagnostik baholash — tahlil qilinadi. Tadqiqotda ikkilamchi manbalarni tahlil qilish, ilmiy maqolalarni qiyoslash va pedagogik natijalarni umumlashtirish metodlaridan foydalanildi. Tahlil natijalari samarali til o‘rganish yagona vositaga emas, balki lug‘at, kommunikativ faoliyat, tinglab tushunish, yozish, feedback va muntazam baholashni birlashtirgan kompleks tizimga tayanishini ko‘rsatadi.