JO‘XORI NAVLARIDA PROTOPLAZMA QOVUSHQOQLIGIGA TUPROQ NAMLIGI DARAJALARINING TA’SIRI

Annotatsiya

Ushbu maqolada Buxoro vohasi sharoitida yetishtirilgan beshta jo‘xori navi (Massino, Qorabosh, Samuray, O‘zbekiston pakanasi, O‘zbekiston-18) hujayra protoplazmasining qovushqoqlik darajasiga tuproq namligining ta’siri o‘rganilgan. Dala tajribalari mo‘tadil va cheklangan namlik sharoitida, o‘simliklarning uchta rivojlanish bosqichida o‘tkazildi. Natijalarga ko‘ra, protoplazma qovushqoqligining qiymati vegetatsiya davomida ortib bordi va eng yuqori ko‘rsatkichlar barcha navlarda gullash bosqichida, cheklangan namlik sharoitida qayd etildi. Cheklangan namlik ta’sirida Massino va Samuray navlarida qovushqoqlik darajasi boshqa navlarga nisbatan yuqori bo‘lib, bu ularning suv tanqisligiga nisbatan himoya-moslashuv xususiyatlarining yuqoriligidan dalolat beradi.