“NIDO” DOSTONIDA QAHRAMON RUHIYATI ORQALI DAVR MUHITINING IFODALANISHI

Abstrak

Mazkur maqolada “Nido” dostonida qahramon ruhiyati orqali davr muhitining badiiy ifodalanishi tahlil qilinadi. Dostonda urush va uning inson hayotiga, ayniqsa, shaxsning ruhiy olamiga ko‘rsatgan ta’siri, qahramonning ichki kechinmalari, iztiroblari, xotiralari va ruhiy ziddiyatlari orqali yoritilishi tadqiq etiladi. Asarda individual ruhiyat va tarixiy-ijtimoiy muhit o‘rtasidagi o‘zaro aloqadorlikka alohida e’tibor qaratilib, qahramonning shaxsiy kechinmalari orqali davrning murakkab ijtimoiy va ma’naviy manzarasi ochib berilishi ko‘rsatiladi. Shuningdek, xotira, iztirob, ayriliq, urush, ona, farzand va vatan kabi obraz va motivlarning qahramon ruhiyatini ochish hamda davr ruhini ifodalashdagi poetik vazifalari tahlil qilinadi. Tadqiqot natijasida “Nido” dostonida tarixiy voqelikning bevosita bayonidan ko‘ra, uning inson ruhiyatidagi aks-sadosi orqali davr muhitining badiiy yaxlitligi yaratilishi asoslanadi.