ИНФИЛЬТРАТИВ ЎПКА ТУБЕРКУЛЁЗИНИНГ ОШҚОЗОН ЯРА КАСАЛЛИГИ ВА ВИЧ-ИНФЕКЦИЯ БИЛАН КОМОРБИД ВА МУЛЬТИМОРБИД КЕЧИШ ХУСУСИЯТЛАРИ

Abstract

Инфильтратив ўпка туберкулёзи (ИЎТ) туберкулёзнинг энг кенг тарқалган клиник шаклларидан бири бўлиб, иш қобилиятидаги аҳоли орасида кўп учрайди. Сўнгги ўн йилликларда туберкулёзнинг клиник кечишида коморбид ва мультиморбид ҳолатлар сонининг ортиши кузатилмоқда. Бу ҳолат, айниқса, ошқозон яра касаллиги ва ВИЧ-инфекция билан биргаликда кечганда, касалликнинг клиник манзараси, диагностикаси ва даволаш натижаларига салбий таъсир кўрсатади. ВИЧ-инфекция фонида иммун тизимининг босқичма-босқич сусайиши туберкулёзнинг кам симптомли, атипик ва суст кечишига олиб келади. Натижада туберкулёз кеч ташхисланади, даволаш муддати узаяди ва асоратлар хавфи ортади. Шу билан бирга, ВИЧ-инфекцияли беморларда ошқозон-ичак тракти касалликлари, хусусан ошқозон ва ўн икки бармоқли ичак яра касаллиги кенг тарқалган. Ошқозон яра касаллигининг асосий этиологик омилларидан бири бўлган Helicobacter pylori инфекцияси туберкулёз билан касалланган беморларда ҳам юқори частотада учрайди. Айниқса, H. pylori-негатив ошқозон яра касаллиги билан инфильтратив ўпка туберкулёзи биргаликда кечганда клиник прогноз ноқулай ҳисобланади.